Raforkueftirlitið hefur gert athugasemdir við gjaldskrárbreytingu Landsnets vegna flutningstapa sem fyrirhugað var að tæki gildi 1. ágúst nk.

Raforkueftirlitið hefur einnig birt samtímis drög að leiðbeiningum um flutningstöp til umsagnar á grundvelli 2. mgr. 24. gr. raforkulaga.  Með tilkomu viðskiptavettvanga raforku hefur gagnsæi, jafnræði og samkeppni á heildsölumarkaði aukist, sem veitir tækifæri til betrumbóta á fyrirkomulagi innkaupa á flutningstöpum og gjaldtöku vegna þeirra.  

Í leiðbeiningunum eru lagðar fram tillögur að gagnsærri aðferðarfræði svo hægt sé að reikna út fyrir fram með skýrum hætti hver vænt gjaldtaka vegna flutningstapa er, og eykur það fyrirsjáanleika og áreiðanleika umtalsvert. Einnig eru innbyggðir hvatar fyrir flutningsfyrirtækið til að lágmarka töp og tímasetja viðgerðir þegar kaup á raforku eru hagkvæmari. Tímafrestur til að koma á framfæri athugasemdum vegna leiðbeininga Raforkueftirlitsins er til 1. september nk. 

Athugasemdir raforkueftirlits við fyrirhugaða gjaldskrá Landsnets nr. 53

Athugasemdir og leiðbeiningar um gjaldtöku vegna flutningstapa

Breyting á innskráningarleið inn á þjónustugátt Orkustofnunar

Breytingar hafa orðið á innskráningarleið inn á þjónustugátt Orkustofnunar. Breytingarnar hafa m.a. í för með sér að Íslykillinn verður ekki lengur í boði sem innskráningarleið. Einhverjir hafa verið að nýta Íslykil til að skrá sig inn sem fyrirtæki og senda inn eyðublöð, gagnaskil eða fyrirspurnir.

Eftir þessa breytingu mun íslykillinn ekki virka og notendur þurfa því að nota síma, skilríki í appi eða skilríki á korti. Ef slíkt er ekki til staðar þarf að heyra í Island.is eða Auðkenni til að útvega réttan aðgang.

Orkustofnun hefur reiknað út uppruna raforku á Íslandi fyrir árið 2023

Sölufyrirtæki sem ekki afskrá upprunaábyrgðir eða sambærilegar afurðir skulu gefa út staðlaða yfirlýsingu.

Orkustofnun hefur reiknað út uppruna raforku fyrir árið 2023 sem er birt í staðlaðri yfirlýsingu. Niðurstöðurnar sjást hér:

Úrgangsefni miðað við uppruna raforku 2023

Upplýsingar sem fram koma í útreikningum Orkustofnunar eiga að birtast notendum raforku árlega á eða með reikningum.

Athygli er vakin á því að eins og fram kemur í stöðluðu yfirlýsingunni er nánast öll raforkuframleiðsla á Íslandi frá endurnýjanlegum orkugjöfum. Einungis 0,02% er frá jarðaefnaeldsneyti. Meirihluti raforku í Evrópu á hins vegar uppruna sinn í jarðefnaeldsneyti og kjarnorku og skýrir það að í útreikningi Orkustofnunar á raforkuleifinni fyrir Ísland er líka jarðefnaeldsneyti og kjarnorka. 

Einnig er bent á það að til að raforkusali getir vottað að hann selji 100% endurnýjanlega raforku þá þarf hann að afskrá a.m.k. jafn mikið magn af upprunaábyrgðum og hans raforkusala. 

TEXTI OG TÖFLUR FYRIR SÉRTÆKU YFIRLÝSINGUNA

https://orkustofnun.is/raforkueftirlit/uppruni/sertaek-yfirlysing

Orkustofnun hefur gefið út eina sértæka yfirlýsingu fyrir árið 2023.

Sölufyrirtæki raforku sem afskráir upprunaábyrgðir í eigin þágu ber að birta sértæka yfirlýsingu. Birta á sértæka yfirlýsingu fyrir 1. júlí ár hvert, sbr. reglugerð nr. 757/2012.

Sértæka yfirlýsingin sýnir hlutfall af afskráðri raforku sem er framleidd með endurnýjanlegum hætti, eða það magn af raforku sem upprunaábyrgðir hafa verið gefnar út fyrir, í hlutfalli við heildarsölu fyrirtækisins. Þegar sölufyrirtæki afskráir upprunabyrgðir í eigin þágu eykst vægi á uppruna raforku sem framleidd er með endurnýjanlegum hætti. Nánar er kveðið á um sértæka yfirlýsingu í 9. og 10. gr. framangreindrar reglugerðar.

Fyrir árið 2023 er eitt fyrirtæki með sértæka yfirlýsingu. Þetta fyrirtæki hefur því afskráð upprunaábyrgðir fyrir allri sölu á rafmagni fyrir árið 2023. Fyrirtækið selur því 100% endurnýjanleg raforka. Sölufyrirtæki er Orka heimilanna.  Sjá hér: https://orkustofnun.is/raforkueftirlit/uppruni/sertaek-yfirlysing

Uppruni raforku - stöðluð yfirlýsing

Umsókn um virkjunarleyfi til stækkunar Sigölduvirkjunar - Gagnamappa

Orkustofnun hefur auglýst umsókn Landsvirkjunar um virkjunarleyfi til stækkunar Sigöldustöðvar í Ásahreppi og Rangárþingi ytra úr 150 MW í 215 MW í Lögbirtingablaðinu. Birtist auglýsingin föstudaginn 17. maí 2024 og þar er þeim aðilum er málið varðar gefið færi á að kynna sér umsóknina og koma á framfæri sjónarmiðum sínum innan fjögurra vikna frá birtingu auglýsingarinnar. Gögn málsins má nálgast með því að smella hér.

Landsvirkjun, kt. 420269-1299, Katrínartúni 2, Reykjavík, hefur óskað eftir virkjunarleyfi til stækkunar Sigöldustöðvar vatnsaflsvirkjunar í Ásahreppi og Rangárþingi ytra, í samræmi við 1. mgr. 4. gr. raforkulaga, nr. 65/2003 og með vísan til 4. gr. reglugerðar um framkvæmd raforkulaga, nr. 1040/2005, með síðari breytingum.

Ætlunin er að auka aflgetu stöðvarinnar með því að bæta fjórðu aflvél við þær þrjár sem fyrir eru, ásamt því að ráðast í nauðsynlegar breytingar á mannvirkjum stöðvarinnar vegna þess.

Skv. ákvörðun Orkustofnunar dags. 7. júlí 2023 er fyrirhuguð stækkun Sigöldustöðvar undanþegin ákvæðum um verndar- og nýtingaráætlun í samræmi við ákvæði 3. mgr. 3 gr. laga nr. 48/2011.

Í ágúst 2023 lagði Landsvirkjun fram umhverfismatsskýrslu fyrir framkvæmdinni til Skipulagsstofnunar. Álit Skipulagsstofnunar lá fyrir þann 18. desember 2023.

Fyrirhugaðar framkvæmdir eru í samræmi við aðalskipulag Ásahrepps 2020-2032 og Rangárþings ytra 2016-2028, og deiliskipulag Sigöldustöðvar í Ásahreppi og Rangárþingi ytra sem samþykkt var í hreppsnefnd Ásahrepps 18. október 2023 og í sveitarstjórn Rangárþings ytra 13. september 2023, sbr. auglýsingu nr. 428/2024 í B-deild stjórnartíðinda.

Orkustofnun hefur farið yfir gögn máls og telur að þau uppfylli viðmið raforkulaga og reglugerðar um framkvæmd raforkulaga til frekari málsmeðferðar.

Auglýsing um umsóknina var gefin út í Lögbirtingarblaðinu þann 17. maí 2024.

Í samræmi við 4. mgr. 34. gr. raforkulaga er þeim aðilum er málið varðar gefið færi á að kynna sér umsókn Landsvirkjunar og veita um hana umsögn. Umsagnarfrestur er til 14. júní 2024. Gögn málsins má nálgast með því að smella hér. 

Nánari upplýsingar veita Rán Jónsdóttir, netfang ranjon@os.is og Kristján Geirsson, netfang kg@os.is. 

Umsagnir skulu sendar með tölvupósti til Orkustofnunar, Grensásvegi 9, 108 Reykjavík, á netfangið os@os.is.