Norrænt samstarf

NER er fjármagnað af Norðurlöndunum fimm og hefur stuðlað að samvinnu um orkurannsóknir sl. 30 ár. Þetta hefur styrkt rannsóknarsamfélagið og skapað möguleika á samstarfi í orkugeiranum.

Norðurlöndin hafa sett sér háleit markmið varðandi kolefnisútblástur og leggja áherslu á græna tækni. Sjóðir NER eru ætlaðir til stuðnings við þessa stefnu með því að auka þekkingu á endurnýjanlegri orku og með því að stuðla að þróun nýrra og samkeppnishæfra lausna í orkumálum.

Stjórn NER og nefndir og stýrihópar á hennar vegum samanstanda af fulltrúum frá sjóðum norrænu landanna, frá stofnunum sem halda utan um orkumál og frá ráðuneytum. Starfsmaður Orkustofnunar hefur verið fulltrúi í stjórn NER á undanförnum árum og á fimm ára fresti þegar Ísland veitir norræna samstarfinu forystu er fulltrúi í Íslands í stjórn stofnunarinnar formaður stjórnar.

- Nánari upplýsingar um starf NER, s.s.útgáfu, áherslur o.fl., má sjá hér 

- Áherslur á formennskuári Íslands 2023 má sjá hér. 

Raforkueftirlit Orkustofnunar tekur þátt í norrænu samstarfi um neyðarstjórnun raforkukerfa landanna. Þátttaka Íslands hófst árið 2006 í kjölfar samkomulags Norrænu ráðherranefndarinnar. Á samstarfsvettvanginum er greint hvaða hættur geti steðjað að raforkukerfum Norðurlandanna sem kalli á að neyðarstjórnaraðgerðir séu virkjaðar og gerðar tillögur um hvernig megi bregðast við þeim.

Í NORDBER taka þátt fulltrúar frá Orkustofnun og Landsneti ásamt fulltrúum sambærilegra stofnana á hinum Norðurlöndunum. Orkustofnun fer með formennsku í NORDBER árin 2019–2020.

Á vegum NORDBER starfa nokkrir vinnuhópar:

• Vinnuhópur um greiningu á áhættuþáttum

• Vinnuhópur um viðbrögð gagnvart árásum á tölvukerfi

• Vinnuhópur um norræna samvinnu um viðhald raforkukerfa

• Vinnuhópur um sameiginlegar viðbragðsæfingar

Raforkueftirlit Orkustofnunar tekur þátt í samstarfi norrænna eftirlitsaðila: NordREG. Helstu áherslur samstarfsins eru að finna sameiginlega snertifleti varðandi raforkumarkaði Norðurlandanna og vinna saman að því að tryggja hagsmuni landanna innan Evrópusambandsins og evrópska efnahagssvæðisins. Á vettvangi NordREG starfa nokkrir vinnuhópar og taka fulltrúar Orkustofnunar virkan þátt í því starfi.