Jarðhitaskólinn heldur námskeið í El Salvador
Jarðhitaskóli Háskóla Sameinuðu þjóðanna heldur í samstarfi við LaGeo,
orkufyrirtæki El Salvador, námskeið í San Salvador dagana 26. nóvember -
2. desember. Námskeiðið er það fyrsta í röð námskeiða sem haldin verða
árlega í Mið-Ameríku á næstu árum. Sams konar námskeið var haldið í
Kenýa í nóvember 2005 fyrir Austur-Afríkulönd. Annað námskeiðið fyrir
Afríku var haldið í Kenýa dagana 12. - 22. nóvember sl. Námskeiðin eru
framlag Íslands til Þúsaldarmarkmiða Sameinuðu þjóðanna.
Þetta fyrsta námskeið í Mið-Ameríku ber titilinn Workshop for Decision Makers in Geothermal Projects in Central-America. Meðal þátttakenda eru ráðherrar og yfirmenn orku- og umhverfisráðuneyta, stjórnendur raforkufyrirtækja og rannsóknarstofnana ásamt helstu jarðhitasérfræðingum El Salvador, Níkaragva, Kostaríka og Gvatemala. Fyrirlesarar verða frá sömu löndum og eru margir þeirra fyrrverandi nemendur Jarðhitaskólans. Einnig verða fyrirlesarar frá Íslandi, Bandaríkjunum, Filippseyjum, Kenýa og Mexíkó. Eitt aðalumræðuefnið verður nýting jarðhita innan og í jöðrum þjóðgarða og friðlanda og verður sérstök áhersla lögð á umhverfissjónarmið.
Á vef Jarðhitaskólans er nánari upplýsingar um námskeið sem Jarðhitaskólinn HSþ heldur erlendis.