Framkvæmdaráðsfundur Alþjóðaorkuráðsins á Íslandi 2009
Á fundi stjórnarþings Alþjóðaorkuráðsins á heimsþingi ráðsins
í Rómarborg í vikunni var samþykkt að halda árlegan framkvæmdaráðsfund
ráðsins árið 2009 í Reykjavík. Um 500 manns munu sækja Ísland heim í
tengslum við fundinn, þar á meðal margir helstu leiðtogar í orkumálum
heimsins.
Össur Skarphéðinsson iðnaðarráðherra mælti fyrir framboði Íslendinga að lokinni kynningu Þorkels Helgasonar orkumálastjóra á stöðu orkumála á Íslandi.
Í ræðu sinni áréttaði ráðherra forystuhlutverk Íslendinga í virkjun jarðvarma, og benti á þá staðreynd að engin önnur þjóð mætir 75% af orkuþörf sinni með endurnýjanlegri orku.
Á stjórnarþinginu eiga á þriðja hundrað manns sæti, en 94 þjóðir eiga aðild að Alþjóðaorkuráðinu. Innan raða þess eru helstu leiðtogar heims á sviði orkumála og mikilvæg stefnumótun og samráð fer fram innan ráðsins.