Fiskeldi

Jarðhitavatn má nota í eldi allra helstu tegunda á fyrstu þroskaskeiðum, en á seinni skeiðum er einungis hægt að koma nýtingu jarðhitans við í strandeldisstöðvum sem helst rækta bleikju, en einnig lax að einhverju marki.  Með því að hækka hitastig á hrognum, seiðum og matfiski eykst vaxtarhraði fiskjarins.  Notkun jarðhitavatns leiðir því til styttri framleiðslutíma og aukinnar framleiðni. Mikilvægi jarðhita í fiskeldi er mismikið eftir tegundum.  Í bleikjueldi er jarðhiti nýttur bæði við seiðaframleiðslu og áframeldi í landkvíum, en bæði laxeldi og þorskeldi byggja að mestu leyti á eldi í sjókvíum og þar liggur mikilvægi jarðhitans fyrst og fremst í seiðaframleiðslu. Á Íslandi eru 25 fiskeldisstöðvar sem nýta jarðhita við framleiðsluna. Miðað við magnnotkun og 10°C hitastig í körum er orkunotkun um 1680 TJ árið 2008.